Múrað og þvegið í göngunum í nótt

Það er langt frá að vera hvunndagsviðburður að sjá múrara að störfum í  Hvalfjarðargöngum og það um miðja nótt.

Óvenjulegt er líka að lagfæra þurfi skemmdir eftir umferðaróhapp með múrverki en undir Hvalfirði er bara svo margt sem er öðru vísi en fólk á að venjast.

Magnús og Ásgeir, múrarar á Akranesi, hrærðu steypu og fylltu af kappi í stóra skellu í steinkápu á vegg sunnarlega í Hvalfjarðargöngum í nótt. Þeir hófu verkið í fyrrinótt og luku því í nótt. Þannig voru lagfærðar skemmdir sem urðu við það að fólksbíl var ekið á talsverðum hraða á vegginn eftir að bílstjórinn sofnaði undir stýri. Hann slapp ómeiddur en ökutækið fór illa og gangaveggurinn þurfti á múrverki að halda til að ná fyrra horfi og ásýnd.

Þetta er eitt af mörgum verkefnum sem unnið er að nótt eftir nótt núna í vikunni. Göngin hafa verið lokuð í tvær nætur og verða lokuð næstu þrjár frá miðnætti til klukkan sex að morgni.

Frá og með aðfaranótt laugardags 28. apríl verður opið að lokinni þessari vinnutörn sem reyndar er árviss viðburður en er venju fremur umfangsmikil í ár vegna allsherjarúttektar sem sérfræðingar verkfræði- og ráðgjafarfyrirtækisins Mannvits annast á ástandi ganganna og tæknibúnaðar þeirra.

Ástandsskoðunin er í tilefni af eigendaskiptum Hvalfjarðarganga í haust. Í nótt sáust fleiri merki um það sem koma skal í eignarhaldi og rekstri ganganna. Gísli Eiríksson, forstöðumaður jarðgangaframkvæmda Vegagerðarinnar, mætti og fylgdist með því sem um var að vera í viðhaldi og kynnti sér tæknibúnað og fleira tilheyrandi starfseminni. Vegagerðin mun annast rekstur Hvalfjarðarganga fyrir hönd ríkisins þegar þar að kemur.

Gylfi R. Guðmundsson, þjónustustjóri Meitils ehf. á Grundartanga,var leiðsögumaður Gísla á vettvangi. Meitill er fyrirtæki á Grundartanga sem annast hefur reglubundna viðhalds- og tækniþjónustu við Hvalfjarðargöng frá upphafi. Gylfi R. og félagar þekkja tækjabúnað og ótal tæknileg rekstraratriði ganganna mun betur en lófa sína.

Vatn flæddi í stríðum straumum niður akbrautir og til botns í göngunum frá þvottabílum sem þokuðust meðfram veggjum beggja vegna akbrauta og hreinsuðu burt ryk og óhreinindi með háþrýstiþvotti. Sífellt undrunarefni er hve óhemju mikið berst af ryki inn í göngin eða verður þar til. Rykið safnast saman og þyrlast upp þegar bílar fara um og mynda sog í „rörinu“.

Ýmsar kenningar eru uppi um uppruna og samsetningu ryksins en þess er að vænta að úr því álitamáli verði skorið á vísindalegan hátt. Spölur fól Mannviti að rannsaka beinlínis og greina vegrykið í göngunum og sú athugun stendur yfir.

 IMG 2530
Gísli Eiríksson, forstöðumaður hjá Vegagerðinni t.v. og Gylfi R. Guðmundsson, þjónustustjóri Meitils ehf., í göngunum í nótt og  við Guðlaug, vatnsþróna í botni gangnna á myndinni hér fyrir neðan.
IMG 2547
IMG 2605
Ásgeir og Magnús múra og laga skellu í steinkápu eftir  að bíl var ekið á gangavegginn.
IMG 2610
IMG 2562
Davíð Reynir Steingrímsson, rafeindaiðnfræðingur hjá Meitli ehf., við skjá í gjaldskýlinu. Hann kannaði hvort ekki væri örugglega allt með felldu varðandi eftirlitsmyndavélar og umferðarljós í gjaldhliðinu. Svo reyndist vera.
 IMG 2619
 Vorhreingerning með háþrýstiþvotti.
 IMG 2540
 Nokkurra daga gamalt ryk á vegöxlum.
 IMG 2543
 Pétur Sigurjónsson, starfsmaður Meitils, fagnar ... sumarkomunni, sigri Liverpool á Roma eða einhverju allt öðru. Alla vega var létt yfir mannskapnum við störf undir Hvalfirði í nótt. Það getur nefnilega líka verið bærilega gaman að lifa 165 metrum undir yfirborð sjávar ...
 

 

Flýtileiðir vegna endurgreiðslu

Spölur ehf. á og rekur Hvalfjarðargöng.

Skrifstofa Spalar er að
Kirkjubraut 28, 
300 Akranes
sími 431 5900, fax 431 5901. 

Skrifstofan (afgreiðsla veglykla) opin:
mánudaga til fimmtudaga  
8-12 og 12:30-16

föstudaga
8-12 og 12:30-15 

Kennitala: 511295-2119

FYRIRMYNDARFYRIRTÆKI

VR Fyrirmyndarfyrirtaeki 2015 VR Fyrirmyndarfyrirtæki 2015 enska Fyrirmyndarfyrirtæki VR 2014 Spölur - Fyrirmyndarfyrirtaeki VR 2013
Fyrirmyndarfyrirtæki VR 2012 Fyrirmyndarfyrirtæki VR 2011 Fyrirmyndarfyrirtæki árið 2010 Fyrirmyndarfyrirtæki VR 2009