Viðbragðsáætlun Hvalfjarðarganga hefur verið endurskoðuð og samþykkt af þeim sem hlut eiga að máli, sú þriðja sinnar tegundar frá upphafi. Hún tekur til verkaskiptingar og samskipta þeirra sem að málum koma við óhöpp eða slys í göngunum.
Sérstök viðbragðsáætlun var í gildi þegar göngin voru opnuð sumarið 1998. Hún var endurskoðuð frá grunni 2004 og hefur verið í gildi í þeim búningi þar til nú að nýja viðbragðsáætlunin leysti hana formlega af hólmi á miðvikudaginn var, 18. desember.
Starfsmenn Spalar eru komnir í jólaskap eins og flestir aðrir landsmenn og hafa komið vinnuumhverfinu í tilheyrandi hátíðarbúning. Ljósin loga á jólatré á skrifstofu félagsins á Akranesi og undir því eru meira að segja jólapakkar. Jólabörnin er sem sagt að finna hjá Speli. Það myndi svo fullkomna aðventustemninguna ef viðraði svo vel að vegfarendur kæmust greiðlega leiðar sinnar til innkaupa og annarra erinda sem fylgja þessum árstíma. Engin spurning samt um færð og veður undir Hvalfirði, frekar hvað gerist beggja vegna fjarðarins!
Umferðin í Hvalfjarðargöngum var tæplega 9% meiri í nóvember í ár en í sama mánuði í fyrra. Aukningin nemur yfir tíu þúsund ökutækjum. Umferðin á þjóðvegum jókst verulega um allt land í nóvember.
Lögregla höfuðborgarsvæðisins mældi ekkert einasta ökutæki á ólöglegum hraða í Hvalfjarðargöngum þegar hún var þar við eftirlit eftir hádegi í gær um einn kílómetra innan við suðurmunnann. Meðalhraði 92 bíla til norðurs var 68 km á klukkustund en þarna er 70 km hámarkshraði. Lögreglan getur ekki orða bundist á vef sínum og segir einfaldlega að aksturslagið hafi verið til fyrirmyndar. Það eru orð að sönnu.
Hvalfjarðargöng verða lokuð aðfaranótt fimmtudags 28. nóvember frá miðnætti til kl. 6 að morgni. Þá verður unnið í rafkerfi/spennistöðvum og nauðsynlegt er að taka á meðan allt rafmagn af göngunum.
Þetta er lokahnykkurinn því verkefni Spalar að uppfylla að öllu leyti öryggiskröfur ESB-tilskipunar nr. 54/2004. Það verður staðreynt með úttekt í kjölfarið.
Umferðin í göngunum jókst umtalsvert í október frá því í sama mánuði 2012 eða um 3,6%. Aukningin fyrstu tíu mánuði ársins 2013 er 2,3%.
Hvalfjarðargöngum verður lokað á miðnætti næstkomandi og þau opnuð að nýju kl. 6 í fyrramálið, að morgni mánudags 4. nóvember. Þetta er síðasta næturlokunin í þessari framkvæmda- og viðhaldslotu sem stóð yfir í fimm nætur í síðustu viku.
Hvalfjarðargöng verða lokuð í fimm nætur í vikunni sem í hönd fer, þ.e. í 44. viku ársins, vegna framkvæmda og viðhalds. Einnig verður lokað að minnsta kosti eina nótt í næstu viku en það skýrist þegar nær dregur.
Unnið verður að viðhaldi og undirbúningi framkvæmda í göngunum á næturnar núna í viku 43, þ.e.a.s. frá aðfaranótt þriðjudags 22. október til og með aðfaranætur föstudags 25. október. Göngin verða opin á meðan en vegfarendur eru beðnir um að taka tillit til þessa og aka varlega. Í næstu viku (viku 44) verða hins næturlokanir sem nánar verða tilkynntar síðar.
Umferðin í göngunum í september var 1,4% meiri en í sama mánuði í fyrra. Vegagerðin mældi á sama tíma verulega meiri aukningu umferðar á hringveginum á eða um 4,6% að jafnaði.
Marinó Tryggvason, afgreiðslustjóri og öryggisfulltrúi Spalar, hefði seint grísað á rétt svar hefði hann verið spurður hvað biði hans á vinnustaðnum á Akranesi í morgun. Það er fullkomlega eðlilegt, enda reiknar enginn með því að hitta fyrir grísi í búri á kontórnum sínum.
Umferð í göngunum dróst nokkuð saman í ágúst miðað við sama mánuð í fyrra eða um 3,3%. Samdrátturinn nemur liðlega 6.300 ökutækjum en til samanburðar má nefna að um 6.800 ökutæki fóru að jafnaði um göngin á sólarhring núna í ágúst.
Tryggingariðgjöld vegna Hvalfjarðarganga lækka verulega með samningi sem Spölur ehf. hefur gert við tryggingarfélagið TM. Tryggingar ganganna voru boðnar út samkvæmt nýjum skilmálum.
Rekstur Spalar skilaði liðlega 120 milljóna króna hagnaði eftir skatta á fyrri hluta árs 2013. Um 34 milljóna króna hagnaður varð á rekstrinum á sama tímabili í fyrra. Umferð í Hvalfjarðargöngum er ívið meiri í ár en ráð var fyrir gert og tekjur af henni sömuleiðis.
Umferðin í Hvalfjarðargöngum jókst um 2,3% í júlí, miðað við sama mánuð í fyrra. Það svarar til þess að 5.250 fleiri bílum hafi verið ekið undir fjörðinn nú en þá. Umferðaraukningin fyrstu sjö mánuði ársins er rétt um 3%.
Fimmtán ár eru liðin í dag frá því Hvalfjarðargöng voru opnuð við hátíðlega athöfn, átta mánuðum á undan áætlun. Síðan þá hefur mikið vatn til sjávar runnið og margir bílar undir fjörðinn ekið.
Ólafur Ragnar Grímsson fjármálaráðherra og Steingrímur J. Sigfússon samgönguráðherra undirrituðu samning við Spöl 25. janúar 1991 og á grundvelli hans var ráðist í framkvæmdir vorið 1996.
Umferðin í göngunum í júní var mun meiri í síðari hluta mánaðarins en í þeim fyrri. Júní var því býsna köflóttur að þessu leyti. Umferðin var í heildina 1,3% meiri en í júní 2012.
Umferð í Hvalfjarðargöngum var 1,3% í maí en í sama mánuði í fyrra. Þetta er nokkurn veginn sama niðurstaða og Vegagerðin fékk úr teljurum sínum við hringveginn.
Spölur, sem á og rekur Hvalfjarðargöng, hefur flutt aðsetur stjórnsýslu sinnar um set á Akranesi, að Kirkjubraut 28. Starfsmenn félagsins fluttu búferlum í gær og opnuðu dyr fyrir viðskiptavinum á nýja staðnum kl. 8:00 í morgun.
Starfsmenn Spalar á Akranesi eru að pakka saman og flytja sig um set í bænum. Vegna flutninganna verður skrifstofa félagsins að Mánabraut 20 lokuð á mánudaginn kemur, 27. maí. Að morgni þriðjudags 28. maí verður skrifstofa Spalar opnuð á nýjum stað, að Kirkjubraut 28!
Umferðin í göngunum í apríl dróst saman um nær 8%, sem auðvitað er mikil sveifla þegar horft er til þess að í mars jókst hún um nær 11%. Skýringin er einfaldlega sú að páskaumferðin var öll í apríl í fyrra en að mestu leyti í mars í ár.
Lokað verður fyrir umferð í göngunum aðfararnætur mánudags 22. og þriðjudags 23. apríl frá miðnætti til kl. 6 að morgni. Þar með lýkur árlegri viðhalds- og hreingerningartörn í þetta sinn. Til stóð að ljúka verkinu í vikunni sem senn líður en varahlutir í búnað skilaði sér ekki frá útlöndum í tæka tíð og fresta varð því lokahnykknum um eina viku.
Hvalfjarðargöng verða OPIN fyrir umferð næstu nótt, þ.e. aðfaranótt föstudags 12. apríl. Til stóð að þau yrðu lokuð vegna viðhaldsvinnu en af því verður ekki. Göngin verða hins vegar lokuð í a.m.k. tvær nætur í næstu viku, eins og tilkynnt hafði verið, þ.e. aðfaranætur þriðjudags 16. og miðvikudags 17. apríl. Hugsanlegt er að þriðju nóttinni verði bætt við en það verður tilkynnt síðar.
Umferð í Hvalfjarðargöngum var 10,7% meiri í mars en í sama mánuði í fyrra. Þetta kemur nákvæmlega heim og saman við mælingar Vegagerðarinnar á hringveginum. Nærtækasta skýringin er sú að páskaumferðin var að miklu leyti í mars í ár en öll í apríl í fyrra.
Spölur sem á og rekur Hvalfjarðargöng hefur frá 2007 varið alls um 300 milljónum króna til ýmissa aðgerða í þágu öryggis vegfarenda og ganganna sjálfra, þar af 40 milljónum króna á árinu 2012. Þetta kom fram í skýrslu stjórnar á aðalfundi Spalar fyrr í þessari viku.
Meðalveggjald í Hvalfjarðargöngum 2012 var 574 krónur. Veggjald fyrir staka ferð í upphaflegri gjaldskrá sumarið 1998, þúsundkallinn góði, er enn þann dag í dag þúsundkall í krónum talið en ætti að vera tvöþúsundkall ef gjaldið hefði hækkað í samræmi við verðlag í landinu!
Umferð í Hvalfjarðargöngum var 2,6% meiri í febrúar en í sama mánuði í fyrra og það þrátt fyrir að mánuðurinn væri einum sólarhring lengri þá en nú. 2012 var nefnilega hlaupár og þá gerast hlutir sem dregnir voru saman í húsgangi forðum: Febrúar tvenna fjórtán ber, frekar einn þá hlaupár er.
Rekstur Spalar eftir skatta skilaði 238 milljóna króna hagnaði á árinu 2012. Umferðin í göngunum var heldur meiri en áætlað var og tekjurnar sömuleiðis.
Umferðin í Hvalfjarðargöngum var tæplega 5,7% meiri í desember en í sama mánuði 2011. Þegar árið 2012 allt er gert upp kemur á daginn samdráttur upp á 1% eða um 18.000 ökutæki.
Spölur gerði í upphafi ársins ráð fyrir allt að 2,5% minni umferð í göngunum 2012 en á árinu 2011. Niðurstaðan er sem sagt að umferðin dróst talsvert minna saman en reiknað var með.
Søren Langvad, fyrrverandi stjórnarformaður Ístaks, lést í Kaupmannahöfn 15. desember 2012, 88 ára að aldri. Hann kom við sögu allra stórvirkjana á Íslandi i meira en hálfa öld og hann á sinn kafla í sögu Hvalfjarðarganga.
Søren Langvad stýrði fjölskyldufyrirtækinu E.Pihl & Søn, sem hefur frá upphafi átt verktakafyrirtækið Ístak hf. að stórum hluta. Hans hefur verið minnst hérlendis fyrir Íslandsvináttu og þátt sinn í að virkja vatnsföll hérlendis. Rétt er að halda því til haga líka að þessi merki framkvæmdamaður kom heldur betur við sögu Hvalfjarðarganga. Hann lá reyndar ekkert á því sjálfur að sér þætti göngin einna merkilegust af því sem hann hefði komið nálægt á Íslandi, enda mjög sérstök framkvæmd á margan hátt.
Spölur ehf. á og rekur Hvalfjarðargöng.
Skrifstofa Spalar er að
Kirkjubraut 28,
300 Akranes
sími 431 5900, fax 431 5901.
Skrifstofan (afgreiðsla veglykla) opin:
mánudaga til fimmtudaga
8-12 og 12:30-16
föstudaga
8-12 og 12:30-15
Kennitala: 511295-2119
 |
 |
 |
 |
 |
 |
 |
 |