Enn keyrt á öryggisbita

Enn keyrt á öryggisbitaFlutningabíll á norðurleið keyrði af miklu afli á öryggisbitann yfir gangamunnanum að norðanverðu um hálfsexleytið í gær, 8. nóvember, og sleit hann lausan úr festingunum beggja vegna. Þetta er enn eitt atvikið af þessu tagi á fáeinum vikum eftir margra mánaða hlé í kjölfar opinberrar umfjöllunar um málið síðastliðinn vetur.

Öryggismyndavél í göngunum tók atburðinn upp á myndband og þar má sjá þegar flutningabíllinn skellur á bitanum og hnykkist til en heldur samt hiklaust áfram í átt að gjaldhliðinu. Samsíða honum upp úr göngunum er fólksbíll og á myndskeiðinu sést mörg hundruð kílóa stálstykkið, þ.e. öryggisbitinn, sveiflast laus fram og aftur í stálkeðjum sem halda honum uppi til öryggis þegar hann losnar úr festingum á veggjum ganganna. Það er hreint og beint skelfilegt að hugsa til afleiðinga þess ef öryggiskeðjurnar hefðu gefið sig og bitinn fallið niður á akbrautina. Komið hefur fyrir að festing eða endi stálbita hafi fallið niður í slóð flutningabíla en sem betur fer án þess að slys hlytist af.

Högg við árekstur af þessu tagi er gríðarlegt eins og menn geta auðveldlega ímyndað sér með því að líta á myndina hér fyrir neðan af verksummerkjum á stálbitanum. Útilokað er fyrir bílstjóra við slíkar aðstæður að halda því fram að þeir verði ekki var við áreksturinn. Sé svo geta viðkomandi tæplega talist vera við fulla meðvitund undir stýri og ekki gerið það málið skárra til afspurnar. Svo öllu sé til haga haldið skal það tekið fram og undirstrikað að bílstjórinn frá í gærkvöld lét vita og heiður skilinn fyrir það. En slíkt er undantekning. Reglan er sú að menn haldi áfram en hverfandi líkur eru hins vegar á að þeir sleppi, þökk sé öryggismyndavélakerfi ganganna.

Ökumenn og flutningafyrirtæki sem láta svona lagað gerast - og það jafnvel ítrekað - eiga sér engar málsbætur. Öllum sem stunda flutningastarfsemi í atvinnuskyni er fullljóst hvar mörk laga og reglna liggja þegar hæð farms er annars vegar.

Vert er að nefna að fyrirtækið, sem átti hlut að þessum glæfraakstri í gærkvöld, efndi til sérstaks átaks í umferðinni fyrir fáeinum misserum og kynnti það rækilega fyrir almenningi í fjölmiðlum. Átakið hét fordæmin fimm og yfirlýst markmið þess var að gera bílstjóra þess að fyrirmynd í umferðinni meðal annars með því að taka tillit til annarra og hafa athyglina í lagi við aksturinn. Ef marka má það sem sjá má á myndbandinu úr Hvalfjarðargöngum í gær hefur átakið snúist upp í andhverfu sína og ætti nú með réttu að heita víti til varnaðar. Enginn vegfarandi ætti í það minnsta að tileinka sér þá hegðun sem þar gaf að líta, síst af öllu atvinnubílstjórar í flutningaþjónustu. 

 

 

Flýtileiðir vegna endurgreiðslu

1. Skráðu bankaupplýsingar með Íslykli

2. Prentaðu út skilagrein og sendu til Spalar

Skrifstofu Spalar að Kirkjubraut 28 á Akranesi hefur verið lokað! 

Unnt er að hafa samband í síma 431 5900 og með tölvupósti: spolur@spolur.is 

 

FYRIRMYNDARFYRIRTÆKI

VR Fyrirmyndarfyrirtaeki 2015 VR Fyrirmyndarfyrirtæki 2015 enska Fyrirmyndarfyrirtæki VR 2014 Spölur - Fyrirmyndarfyrirtaeki VR 2013
Fyrirmyndarfyrirtæki VR 2012 Fyrirmyndarfyrirtæki VR 2011 Fyrirmyndarfyrirtæki árið 2010 Fyrirmyndarfyrirtæki VR 2009