Spölur - Hvalfjarðargöng

Umferð í Hvalfjarðargöngum var um 8% minni í aprílmánuði en á sama tímabili i fyrra. Þetta er mikil sveifla frá því í mars og skýrist af því hvenær páskar voru í ár.

Páskaumferðin var öll skráð í apríl árið 2009 en í ár bar skírdag upp á 1. apríl og stærstur hluti vegfarenda á leið í páskafrí var því á ferð i blálok marsmánaðar. Umferðartölurnar páskanna 2010 lentu því eðlilega á bæði mars og apríl í bókhaldi Spalar. Af þeim ástæðum skyldu menn ekki hrapa að ályktunum um þróun mála í umferðinni í göngunum með því að horfa gagnrýnislaust á þá staðreynd að umferð í apríl jí ár ókst um ríflega 7% í mars en minnkaði hins vegar um 8% í apríl!

Raunsannari mynd fæst með því að leggja saman umferðartölur beggja mánaða, annars vegar 2009 og hins vegar 2010. Sá samanburður leiðir í ljós 0,8% samdrátt og sú tala segir það sem segja þarf um stöðuna á þessum síðvetrarmánuðum 2010.

Spurningin er svo hvað næstu mánuðir bera í skauti sér. Hvergi sér fyrir enda samdráttarskeiðs í efnahagslífinu í bókhaldi heimilanna og eldsneytisverðið hækkar bara enn og aftur. Raunhæft er því að ætla að umferðartölur á næstunni beri þessa ástands merki.

Þetta yfirlit miðast við rekstrarár Spalar, þ.e. frá byrjun október til loka september ár hvert.

*Þ.e. breyting frá sömu mánuðum rekstrarárið 2008/2009