Átta bílum var ekið á 90 km hraða eða þar yfir þegar lögreglan fylgdist með umferðinni til norðurs í Hvalfjarðargöngum frá mánudegi 23. til mánudags 30. nóvember 2009. Sá sem hraðast ók var á 119 km hraða og má búast við að verða rukkaður um 60.000 króna sekt og fá þrjú refsistig skráð á sig í ökuferilsskrá.
Slíkur háskaakstur stefnir að sjálfsögðu öðrum vegfarendum í stórfellda hættu og ökumaðurinn var í raun hársbreidd frá ökuleyfissviptingu. Hann hefði nefnilega misst skírteinið sitt í einn mánuð fyrir að aka á 121 km hraða þar sem hámarkshraði er 70 km.
Góðu fréttirnar eru hins vegar þær að einungis 0,9% ökumanna óku á ólöglegum hraða á vöktunartímanum eða 128 af alls tæplega 14.500. Meðalhraði þeirra brotlegu var tæplega 84 km/klst.
Þorri vegfarenda ekur því innan marka skynsemi og laga en svo eru því miður fáeinir sem flokkast undir rumpulýð umferðarinnar og ættu að vera annars staðar en undir stýri.
