Spölur - Hvalfjarðargöng

Umferðin í Hvalfjarðargöngum dróst saman um innan við 2% á rekstrarári Spalar, frá októberbyrjun 2008 til septemberloka 2009. Mesta athygli vekur hve samdrátturinn er miklu meiri á fyrri hluta rekstrarársins en á þeim síðari.

Þegar á heildina er litið fóru um 36.000 færri bílar um göngin á nýliðnu rekstrarári en á rekstrarárinu þar á undan, sem er samdráttur um nákvæmlega 1,83%. Þetta er minni samdráttur en hefði mátt ætla að yrði þegar fyrstu umferðartölur eftir hrunið mikla lágu fyrir í fyrra.

Á tímabilinu október-mars fækkaði bílum á ferð undi rHvalfjörð um 51.000 frá sama tíma rekstrarárið 2007/2008 en þeim fjölgaði hins vegar um hátt í 15.000 á tímabilinu apríl-september miðað við sama tíma í fyrra.

Októbermánaðar 2008 verður að sjálfsögðu lengi minnst vegna bankahrunsins og engum kom á óvart að umferðin í Hvalfjarðargöngum minnkaði þá um 10,3% miðað við sama mánuð 2007. Samdráttur mældist líka í nóvember og desember en örlítil aukning hins vegar í janúar. Í febrúar var samdráttur og í mars dróst umferðin saman um heil 14%. Efnahagskreppan skýrir þá sveiflu hins vegar aðeins að hluta til, skýringin er öllu frekar sú að páskarnir voru í apríl í ár en í mars árið 2008. Páskaumferðin var þannig ekki skráð í sömu mánuðum 2008 og 2009 sem skekkir samanburð á umferð í mars og apríl.

Á síðari helmingi rekstrarársins dróst umferð saman í maí, ágúst og september en jókst hins vegar í apríl, júní og júlí miðað við sömu mánuði 2008.