Lögreglan stóð hundrað og einn ökumann að því að aka yfir leyfilegum hámarkshraða í Hvalfjarðargöngum fyrir síðustu helgi. Hinir brotlegu óku að jafnaði á tæplega 90 km hraða en þrír mældust á yfir 100 km hraða.
Þetta kemur fram á heimasíðu lögreglunnar í dag. Þar segir að þessi hraðakstur vekji athygli í ljósi þess að „umrædda daga var sérstaklega mikil umræða í þjóðfélaginu um umferðarmál. Þar voru banaslys og hraðakstur einkum til umfjöllunar. Greinilegt er að sumum gengur illa að temja sér betra akturslag í umferðinni og er það mjög miður.“
Lögreglan í Reykjavík annast eftirlit með hraðamyndavélum Hvalfjarðarganga. Hámarkshraði í göngunum er 70 km.
